La Sigulêda

Còl ch' a 'gh vōl per 4 persòuni:

 

4 ōv

4 o 5 sigulôt cun al gâmb frèsch

1 cucêr schêrs ed farèina

2 manêdi ed Grâna

'na spricadèina d' aşèj cumûn

sêl, pèiver, e ôli intēr còl ch' a 'gh vōl e a piaşèir

 

Preparasiòun:

dôp avèir vudê l'ôli ind la padèla, fê sufrézer i sugulôt tajê a rundèli cun ânca i gâmb: a dêve dvintêr pâs, scunî da l' ôli ed cutûra e lasê ch' a dvèinter frèd e, cun chêlma, vudèj in 'na supirèina dové, préma î sbatû, bèin a mōten, j ōv, la farèina, al Grâna cun sêl e pèiver. Şmeşdê al tót  e turnê a mèter ind la padèla in dóve l'ôli al srà incora chêl, metî inséma 'l fōgh e lasê cōşer. Quând l'é côta tulîla via dal fōgh e sprichê cun 'd l' aşèi (se Balsâmich Aragosta la dvèinta 'na fōla!).

 

Nôti e curioşitê:

l' é ûn di piât pôver ed la vècia cuşèina arşâna, apetitōş e fâcil da fêr. L' é fât cun tót chî prodòt che ēren, 'na vôlta, i fundamèint ed la nôstra cuşèina. L'é a la bòuna, mó stê atèint an fêrla mìa dvintêr trôp ûnta.

Soquânt în dal parèir che la sigulêda la sìa sōl 'na fritêda ed sigòli,  di êter la prepêren cme un scarpasòun, mó in realtê l' an sumélia a nisûn ed chî piât lé, la sigulêda la dêv èser cumpâgn a quî che ciamòm: ōv strapasê.

 

E... bòun aptît!