La Sêla dal Triculōr

 

Sêla dal Triculōr

Al Gunfalòun

La Bandêra dal 1797

Da Piâsa Grânda, s' es guêrda al Palâs dal Comûn, la Sela dal Triculōr l' é a mansèina ed l'ingrès principêl sòta a cl' alsêda ch' a 's vèd insém al tèg.

Progetêda e fâta da l'inzgnêr bulgnèiş Ludovico Bolognini (1739 – 1816), l' é stêda pinsêda cme archévi duchêl.

In sté sêla, şvudêda dal j impalcadûri ed l'archévi, al 27 dicèmber 1796 a s' în riunî i rapreşentânt dal sitê lébri ed Rèz, Mòdna, Bològna e Frêra per dichiarêr la nâsita ed la Repóblica Cişpadâna.

Al 7 de znêr dal 1797 só propôsta ed l' abê Giuseppe Compagnoni ed Lugo al Cunséli di deputê dal sitê lébri àn siēlt cme stindêl i trî culōr vèird-biânch-ròs che, ind al 1848, în dvintê i culōr ed la Bandêra nasionêla ( al pré mudèl l'êra a bândi zachêdi). La Sêla dal Triculōr, ciamêda in prinsépi Sêla Pateriôtica, la rapreşèinta a sègn ed l' impègn civîl ed la sitê. Adèsa l'é al pôst in dóve a 's riunés al Cunséli Comunêl, l'é a gh'é ânca tgnû dacât al Gunfalòun ed la sitê, decorê 'd amdâj d'ôr al Valōr Militêr.

Al Gunfalòun, piturê da Ottavio Lavagna ind al 1765, al gh' à da 'na pêrta al figûri ed la Madòna ed la Giêra cun sòta Sân Prôspert tra i Sânt Grisanto e Daria da cl' êtra pêrt al stèma dal Comûn, l'é stê restarvê ind al 2007 da ''Reastauro Tessile'' 'd Albinèa.

La Sêla la vîn druvêda per di şpuşalési, cunferèinsi e manifestasiòun culturêli.

Tót j ân, al 7 de znêr, la sitê la festègia l' aniversâri ed la nâsita dal Triculōr, a la preşèinsa di grôs personâg dal Stêt.

L'é atâch a gh'é ânca al Muşèo dal Triculōr dóve în in mòstra di documèint e 'd j arcôrd antígh relatîv a la stôria ed la Bandêra da la só nâsita e ind al divêrsi fōrmi ch' la gh' à 'vû ind al peréiod tra la nâsita ed la Repóblica Arşâna e la Restaurasiòun.

La Sêla dal Triculōr dal d'ed fōra