Salâm Fiurtèin frét

 

(tôta da ‘na vècia risèta, justêda un pô)

 

Còl ch' a 'g h vōl:

 

- Fèti: (trèi o quâter a tèsta) ed salâm Fiurtèin frèsc (4/5 dé e ch’ al tègna la fèta) o pastōş (stagiunê       mìa pió ed 30 dé) êlti 1 centémeter e mèz/dû

- Farèina: asê da infarinêr, cun bundânsa, al fèti dal salâm

- Butēr: asê per dêr 'na bèla bzuntêda al fònd ed la padèla da frézêr

- Vèin: Biânch de Scandiân sèch ch’al spóma

- Pèiver nîgher (o pevrunsèin ròs picânt) maşnê

 

 

 

 

Preparasiòun:

 

Fêr deşfêr piân pianèin al butēr int la padèla, int al mèinter infarinêr, bèin a mōten, al fèti ed salâm; quând al butēr  al s' é deşfât dêr só un pô di pió a la fiâma sòta la padèla e, apèina al butēr al cumîncia a s’ciuplîr, pugêr al fèti ed Fiurtèin e fêri rustîr in pânsa e in schîna (1 – 2 minût cîrca per pêrt), quând in quêşi dal tót rustîdi vudêr al vèin, (a ôc cîrca dû/trî cucêr da têvla), insém a ògni fèta, stachêr un pô (15/20 centémeter) la padèla da la fiâma e lasêr şvapurêr al vèin. Scartêr al grâs ch’al pōl èser gnû fōra, mèter al fèti insém al piât (s' es pōl chêld) e spulvrêr cun al pèiver (o al pevrunsèin ròs picânt) a piaşèir e servîr al fèti bèin chêldi.

Cumpagnêr al salâm Fiurtèin frét cun 'd la sigòla, o verdûra mésta, fréta in pastèla e/o pulèinta rustîda o fréta e, an pōl manchêr, un bòun Lambrósch sèch dal culèini arşâni.

 

 

E...  bòun aptît!