Al Rîş cun la tevdûra

 

Còl ch ' a 'gh vōl per 4 persòuni:

 

250 gr. ed rîs per rişôt

1 léter ed brôd

3 ōv

3 cucêr bundânt ed furmâj Grâna radû

1 psigôt ed pèiver

sêl

 

Preparasiòun:

fê bojêr al brôd e al rîş fîn quând al rîş l'é quêşi côt (15/16 minût).

A pêrt şbatî j ōv cun al Grâna e al psigôt ed pèiver. Ind al brô, ch' al bòj, vudê la şbatûda, şmesdê un pô fôrt an dêv mìa fêr i gnôch. Al calōr dal brôd e dal rîş a fân lighêr l'ōv e al furmâj che a se şparpâgnen, in brîşi, ind la mnèstra.

Al và servî chêld e, a piaşèir, cun 'na bòuna infurmajêda.

 

Nôti:

al j azdōri 'd un tèimp a fêven cōşer al rîş ind l' âcva buĵnta pôch salêda, a tirêve só al rîş dimòndi al dèint. A sculêven al rîş e al pasêven ind al brôd buĵnt, al fêven cōşer per dû o trî minût a l' ûltem mumèint a 'gh vudêven la şbatûda e pó al servîven. Cun sta manēra ed fêr al brôd al 's infisés mìa.

 

Curiositê:

La tevdûra l'é un cundimèint antîgh, bèle preşèint ind i vèc léber, al gnîva druvê per rinfursêr un brôd pôch savurî. 'Na vôlta, quând a gh'êra ed la filóma, al servîva a inrobustîr al brôd vansê ed la domènica che despès, per fêrel bastêr per tóta fa faméja, al gnîva şlunghê cun 'd l' âcva.

Csa vōl dîr ''tevdûra'' ? (in 'na pêrt ed la pruvîncia la ciâmen ''terdùra'')  agh'é chi pèinsa che la tradusiòun in italiân la sìa ''tridura'' mó ''tridura'' ind i disionâri italiân l' an gh'é mìa, a gh'é ''tritura'' che vōl dîr tajêr un quèl in tânt pcòun céch, oséia tridêrel. In pôchi parôli la tradusiòun in italiân l' an gh'é mìa. Ed sicûr al nòm ''tevdûra'' o ''terdùra'' al s' arfà a l'armes'ciânsa ed l'ōv cun al furmâj che vudêda ind al brôd chêld, e in muvimèint, la se şparpâgna in tânti brîsi e şbrindâj.

 

 

E... bòun aptît!