Piâsa dal Mûnt

 

Adèsa l' é ciamêda piâsa Cesare Battisti mó per nuêter arşân l'é sèimper Piâsa dal Mûnt l’é ‘n piâsa céca a fōrma d’ ōv  a mèz tra Pôrta Sân Pêder e Pôrta Sân Stêven, a dân insém a la piâsa trî di pâlas pió cgnusû ed Rèz: al Palâs dal Capitân dal Pôpol, al Palâs dal Mûnt ed Pietê e al Palâs Bussetti.

 

Al véi che pôrten in sté piâsa în: da matèina la Via Emélia Sân Pêder da Pôrta Sân Pêder, da sîra la Via Emélia San Stêven da Pôrta Sân Stêven, da mezdé Via Carducci e Via Corridoni da Piâsa Grânda (Piâsa Prampulèin) e da mezanôt Via Crispi da Piâsa ed la Vitōria. Da la Piâsa a 's vèd ânca la Tòr ed l' Arlòj insém al Palas dal Mûnt ed Pietê, tirêda só int al 1216 l'é êlta 47 mêter, l' a 's vèd ânca da Piâsa Grânda.

 

Int al 1481 ûn d' j arlòj l'é stê fât da Giampiero Raineri da Pèrma che, soquânt ân dôp cun só fiōl, l'à fât l'arlòj ed Piâsa Sân Mêrch a Venèsia. Dop incòra, int al 1504 e sèimper i Raineri, àn fât n'êter arlòj per la Tòr cun al figûri ed la Madòna, i trî Rè Mâgi e dû Anzêl : incô, al stâtvi, în tgnûdi da cât int i Musèi Cévich ed Rèz.

 

 

 

 

 

 

 

 

 

 

 

 

                                                                      

Palâs dal Mûnt ed Pietê

Palâs dal Capitân dal Pôpol

Piâsa dal Mûnt

Piâsa dal Mûnt

Piâsi e Palâs