Al Patòuni

Còl ch ' a 'gh vōl:

 

j avâns de mnèstra ed rîş o dal tajadèli sóti

o dal mnestròun sót cun 'dla pâsta,

'd j ōv,

dal bòun Grâna radû,

ed la farèina,

dal pèiver ( s' a' v piêş)

sêl

 

Preparasiòun:

an gh' é mìa la quantitê ed la rôba perchè l'é 'na risèta da fêr a ''ôc'', tót a dipènd da quânta mnèstra a gh' î sòt mân, al secrēt l'é che l'impâst al dêv dvintêr mìa trôp pastōş mó gnâ trôp dûr a gh' è da druvêr un pô ed cunisiòun,  la quantitê ed la farèina la dêv èser mēno ed la quntitê dal furmâj.

Dôp avèir impastê tót j elemèint insèm, tulî 'na cuciarêda bèla réca ed l'impâst fê 'na bôcia cun al mân e schisêla un pô ind al cèinter, frişî la patòuna in 'na padèla cun dl' ôli intēr buĵnt, j ôrel a dêve èser bèin rustî, sculê e fê sughêr insém a 'dl chêrta zâla o da cuşèina.

 

Nôti:

quând a frişî la préma patòuna s' a vdî che la stà mìa insèm zuntê a l'impâst un pô ed farèina, se la dvèinta trôp dûra zuntêgh soquânti cuciarêdi ed lât.

 

Curioşitê:

còsta, a préma vésta, la sèmbra 'na risèta fâcila da fêr mó an n'é mìa acsé perchè fêr dal bòuni patòuni a 'gh vōl dal sovermân e dla şgalmêdra. La patòuna l'é dabòun 'na specialitê ed la cusèina arşâna perchè ed còsta la gh' à al dôti principêli: l'é a la bòuna e genuvîna. 'Na vôlta al patòuni a gnîven fâti cun j avâns ed la mnèstra dal mezdé, al dé d' incô, ch' a 's pèişâ tót per la ''lénia'',  j avâns a gh' în mìa pió.

 

E... bòun aptît!