La Panêda

 

Còl ch' a ' gh vōl:

 

150 gr ed pân vèc

1 léter d' âcva cîrca

1 spîgh d' âj

2 cucêr réch d' ôli bòun

furmâj Grâna radû, a véta

sêl

 

Preparasiòun:

Tajê al pân a fèti un pô sutîli, fê bòjer l'âcva, zuntêgh al pân, al spîgh d'âj e salê, fê cōşer a fōgh bâs fîn quând al pân l' é dvintê paparôcia e l'âcva la s'é sughêda dal tót, zuntê l'ôli, tirê vìa l' âj e lasê insavurîr per un pô insém al fōgh bâs. Servî chêld cun 'na bòuna infurmajêda ed Grâna apèina radû.

 

Nôti:

druvê dal pân cun dimòndi brîşa, dmèj còl comûn a têri e s' l' é  muntanêr l'é dmèj.

 

Curioşitê:

còst l' é un piât a la bòuna e puvrèt, al gnîva fât quând a gh'ēra ed la filóma. Per dimòndi tèimp l'é stê ânca al magnêr dal dòni incînta perchè al vèci nôni a dgîven che magnêr dal pân a 's fêva pió lât.

Pôst che a 's digerîva bèin l'ēra adât a i putîn da lât in dal peréiod ed la şvesêda o cme préma pâpa insèm al lât ed la mêdra, e, pervìa ch' a gh' é pôch da biasêr, l' ēra adât ânca pr' i vèc cun pôch dèint.

Mó, purtrôp, al dé d'incō an gh' é mìa pió al pân 'd 'na vôlta, cól pân che quând l'ēra vèc al saîva incòra ed farèina e ch' a 's priva magnêr dôp dû o trî dé e  pió da la cutûra perchè l'ēra incòra bòun. Adèsa a gh' òm dal pân ch' l' é buòn ed giurnêda e mìa etertânt al dé dôp.

 

E... bòun aptît!