La Stría

 

Còl ch'égh vōl per 4 persòuni:

 

500 gr. ed farèina

300 gr 'd âcva

50 gr. 'd distrót

1 cucêr 'd ôli bòun

1 cucêr ed sêl grôs

sêl fîn còl ch'ègh vōl

 

Preparasiòun:

Şmercê, la farèina, l'âcva, al distrót, l'ôli e al sêl fîn e impastê cme per fêr ed la pâsta da pân. Lasê arpunsêr p'r un pô l'impâst pó spianêl cun al mân int un sōl lêregh e bâs da fōren che, un pô préma, a gh'î bşuntê al fònd. Préma 'd infurnêr sparpagnê al sêl grôs insém a la pâsta. Lasê in fōren, a chêld moderê (150° cîrca), fîn a quând a vdî la pêrt êlta ed la stría indurêres  (pió l'inscurés pió la stría la dvèinta sèca).

L'è bòuna chêlda, frèda, cun dal salóm o da per lē… mó cun un bòun bicēr 'd Lambrósc (p'r i pió grând però!)

 

Stòria e curioşitê

La stría l'é ûn di tânt môd ed cme vîn druvê la pâsta dal pân. Fîn a pôch tèimp fa la gnîva preparêda da la zdōra a la matèina dal dé dedichê a fêr só al pân. Al dòni a tgnîven da 'na pêrt un pô 'd l'impâst ch' al gnîva druvê a fêr al tânti pagnôti che duvîven  èser la scôrta 'd la panarèina per tóta la stmâna.

L'insavurîven cun un pô 'd distrót, a tirêven 'na sfòja mia tânt êlta che metîven a cōşer dôp avèir fât al pân. La stría, mésa atâch a l'imbocadûra dal fōren, incòra dimòndi chêld, l'ēra prûnta in pôch minût. Pulîda cun la mân da la sèndra ch' la 's ēra pugêda insém al piân 'd cotûra  dal fōren, la gnîva tajêda e pó magnêda, cun pasiòun, da i ragâs ed cà che int al mèinter ēren cōrs e, arciamê dal bòun prufóm dal pân, îven ocupê la cà cun  'na cunfuşiòun  alēgra. 'Na clasiòun divêrsa dal j ētri, almēno 'na vôlta  la stmâna. Mó i ragâs, che saîven còl che sucedîva fîn da la sîra préma (îven vést la şdasadûra 'd la farèina e la preparasiòun quêşi mâgica 'd l'alvadōr) ēren şvèli préma dal sôlit prûnt a dêres batâlia per cunquistêr al pân chêld apèina fât mó préma ed tót l'ēra la cunquésta 'd un pcòun ed la patòuna salêda che, sibèin al nòm, an gh' la cavêva mia a fêr gnîr in mèint al nôti spaurōşi di filôs dal stréj.

Mó perché un pcòun ed pân da la gròsta s'ciôdga, da l' ânma biânca e sèinsa cōlpi, l'ēra ciamêda 'stría'?

A gh'è da savèir che, mía tânt tèimp fa, uşêva mèt'r int al fōren, préma 'd sistemêregh al pân e cun l'intensiòun s'cèta ed portafurtûna, un pcòun, pió o mēno grôs, ed pâsta ed pân a fōrma 'd fantôc ch' al duvîva figurêr 'na stría. Al cûmpit de sté gèst , 'na pacéfica ofêrta 'd sacrifési préma 'd l' infurnêda, l'ēra còl de scungiurêr i spîrit malégn e asicurêr 'na grôsa quantitê ed bòun pân per tóta la stmâna.

Alōra la stría bruşadésa o pôch côta, a secònd s' l'ēra caschêda vşèin o luntân dal brêşi di fâs, la gnîva tôta vìa dôp la cotûra dal pân. Purghêda dal fōgh e dal bundânt sêl stremnê insém, l'ēra fâta a pcòun e dêda da magnêr a i ragâs ed cà.

 

Còsta l'é óna dal tânti uşânsi ch'în sparîdi da la nôstra véta perché un lavōr, còl ed fêr al pân int al fōren ed cà, an 's fa pió; per cà an 's sèint mia pió al bòun udōr ed pân apèina côt e la stría portafurtûna la 'n vin pió magnêda da i ragâs arivê  'd cōrsa arciamê da cól prufóm.

 

Al dé 'd incō un gèner de stría la prî catêr int al pizaréi mó còla l'é un pcòun ed pâsta, da pizza, côta int al fōren mó cun gnînt insém.

 

 

E... bòun aptît!