La Picâja

 

Còl ch' agh vōl

 

700 g de spîgh ed pèt ed vidèl,

70 g ed Grâna radû,

50 g ed pân radû fîn,

60 g ed persót a dadèin

1 ôv,

1 spîgh 'd âj,

1 cióf 'd erbòuni tridêdi,

1 côstla ed sèler,

1 carôtla,

1 sigòla

sêl, pèiver e nōş muschêda - còl ch' égh và

 

Preparasiòun:

şmercêr pân, furmâj, sêl, pèiver, un psîgh ed nōş muschêda, l'ōv, al persót a dadèin e l'âj tridê. Impastêr bèin a mōten in môd che al tót al se şmêrcia a l'istèsa manēra (se necesâri zuntêr un cucêr 'd lât). Tōr via j ôs dal spîgh ed pèt o, edmèj, fêl fêr al vóster maslêr che, pió prâtich, a l'arvirà a sâca. In sté sâca mèter dèinter al miscóli maridê, mó impî mia trôp perchè la sâca la pré cēder e lasêr gnîr fōra còl ch' a gh'é dèinter. Cuşir la sâc cun un fîl rubóst da cuşèina e an scurdêres mia ed furêr pió vôlti la chêrna cun 'na fursèina.

Mèter la sâca pîna in 'na tègia in dó, quând l'âcva la bòj, a srân stê zuntê al sèler, la carôta, e la sigòla. Fêr cōşer per cîrca dō ōri e mèz. Dôp la cutûra, tirêr via la picâja, mètregh un pèiş insém per dêregh la fōrma pió piâta e lêrga. Lasêr arsorêr, pó tajêrla a fèti, (s' as vōl 'na bòuna preşèinsa an tajêri mia trôp sutîli).

 

Curioşitê:

 a Rèz "picâja" as dîs a 'na persòuna pió elta dal normêl: "Li ló l'êlt cme 'na picâja" e an 's capés a mia che relasiòun a gh'é tra cól dét lé e cla risèta ché.

 

 

E...  bòun aptît!