La Mnèstra spôrca

 

 

Còl ch' agh vōl

 

Per la sfòja:

200 gr ed farèina,

2 ōv,

1 cucêr ed lât

1 cucêr 'd ôli bòun (a piaşèir)

 

P'r al pést

200 gr. ed chêrna savurîda, mia gruplōşa e gnân grâsa,

1/2 sigòla,

80 gr. ed butēr,

1 ōv,

2 manêdi ed Grâna

1 manêda ed pân radû

dal brôd,

sêl, pèiver, nōş muschêda - còl ch' égh và

 

Preparasiòun:

sufrézer al butēr cun la sigòla tajêda a pcòun, zuntêr la chêrna  tridêda , al sêl e al pèiver. Lasêr cōşer piân (se necesâri ajutêres cun soquânti cuciarêdi ed brôd). Lasêr arsorêr la chêrna, zuntêr l'ōv, al Grâna al pân radû e un psîgh ed nōş muschêda. Tulî l'impâst ed la sfòja e quând l'é stêda bèin tirêda cun la canèla, cun curtèl da la pêrta in dó 'l tâja mia, tirêr un sègna da divéder la sfòja in dō pêrti cumpâgn. Ind la pêrta piò atâch stènder al pést preparê, arblêr la secònda pêrt ed la sfòja insém a cl'êtra e schisêrla pó cun 'na presiòun alzēra dal mân, in môd che in mèz al dō pêrti de sfòja, bèin unîdi tra 'd lōr, al pést al se sparpâgn edmèj. Cun la rudlèina ed la pâsta, tajêr tânti strési êlti 2 centémeter cîrca e pó tajêr tânt quadertèin ed 2 centémeter cîrca. Cōşer in un bòun brôd ed chêrna. Servîr cun 'na bòuna infurmajêda.

 

Curioşitê:

còsta l'é 'na risèta vècia cun un nòm curiōş: "mnèstra spôrca", còst perchè un quêlch quadertèin as pōl ròumpres  e al pést al và a "spurchêr" al brôd. L'é 'na mnèstra a la bòuna pió di caplèt e al laşâgni mó, cme savōr, la 's arvîşa dimòndi a sti piât "nôbil" ed la nôstra cuşèina.

 

 

E...  bòun aptît!