I Verşèin arşân

 

Còl ch'égh vōl per 4 persòuni:

 

150 gr. ed fòj 'd vèirşa,

300 gr. ed chêrna ed mânz tridêda,

50 gr. ed murtadela tajêda a dadèin dimòndi céch,

50 gr. ed sansésa

30 gr. ed Grâna radû,

1 cucêr 'd arbòuni tridêdi,

1 cucêr ed basélich tridê,

1 ōv,

sêl còl ch'égh va

pèiver (a piasèir) còl ch'égh va.

 

Per la cutûra

 

50 gr. ed pansèra tridêda,

30 gr. ed butēr,

2 fòj 'd sêlvia,

1 sigòla tridêda,

1 spîgh 'd âj tridê,

1 bicēr ed brôd,

½ bicēr ed vèin biânch sèch

 

Preparasiòun

 

An druvêdi mia al fòj d' ed fōra 'd la vèirşa ch' în dûri; int al tajêri int al mèz tirê via la côsta cusî in un mèz léter 'd âcva buiĵnta, un pô salêda per 5 minût cîrca.

Scunî e destèndri a sughêres e arsorêres inséma 'n burâs, int al mèinter preparê al pîn.

Unî la chêrna, la sansésa, la murtadèla, unî ânch óna o dō fòj ed vèrşa tridedi, l'ōv, al furmâj, al sêl, al pèiver (se 'v piêş), al j arbòuni e al basélich, şmercê bèin da fêr un impâst.

Int al fòj ed vèirşa avêrti metî un pô 'd impâst asê per èser vûje só da la fòja e lighê cun al fîl da cuşèina che, quând i verşèin în côt, al dēv èser tirê via.

Int 'na casarōla bâsa fê sufréşer la sigòla, la pansèta, al butēr, l'âj e la sêlvia. A cutûra fâta unî i verşèin, bagnêi cun al vèin biânch e al brôd, salê secònd al vôster góst e fê cōşer a fōgh bâs per mèz' ōra, quarantesînch minût o anca pió s' l'é necesâri. Pió l' é lònga la cutûra  pió al pîn al srà sôd.

Ógni tânt girê e controlê che 'n sûghen mia trôp e che la sigòla l' an dvèinta mia scûra, s' l'é necesâri a prî bagnê cun soquânt cucêr 'd âcva chêlda.

Servî i verşèin chêld cun abundânt sûgh ed cutûra bèin ristrèt, în bòun chêld, mó în dimòndi bòun ânca frèd.

Naturalmèint cumpagnê da 'n bòun Lambrósch Arşân

 

Curioşitê

 

Piât carateréstich ed l'invêren, frût ed la fantaséia dal nôstri redōri e ânca 'd j ûs cuntasùdèin, l'unés 'na verdûra che mia sèimper la piêş a tót, specialmèint a i ragâs, cme la vèirşa a la chêrna da fêr un piât gustōş e da i savōr decîş. L'ēra ânca l'ucaşiòun bòuna per druvêr j avâns dal dé préma o quî dôp 'd un dé 'd fèsta.

Al pîn al pōl èser fât, e al vîn fât, cun dimòndi êter impâst, rîş, verdûri e cambiêr ânca gèner ed la chêrna a secònda di vôster góst; agh'é chi, per fêr pió prèst, al drōva ânca dal ragó 'd chêrna ch' al gh'à in cà şmercê cun pân e furmâj radû.

Cun al nòm "verşèin" în ciamê ânca di salamèin cûrt (ed circa 50 gr.) frèsch cme la sansésa, cun l'impâst tridê fîn fât cun sōl la chêrna 'd nimêl cun la zûnta 'd âj e savōr. In Lumbardéia chi salamèin ché a vînen côt in môd normêl cun la vèirşa, d'ed ché a sèmbra, che deşvègna 'l nòm però a gh'é chi dîş che al nòm vèira al sia "varşèin" (varzini in italiân) da Varzi paèiş in pruvînca ed Pavéia zôna famōşa per la produsiòun ed gustōş salâm.  În ânca dèinter la risèta 'd la "casoeula " al famōş piât lumbêrd.

 

 

E... bòun aptît!