I Valişèin

 

Còl ch'é vōl per 3 persòuni:

 

6 féti ed filèt ed nimêl

80 gr. ed butēr

60 gr. ed murtadèla tajêda a quadertèin céch

2 bòuni manêdi ed Grâna radû

1 ōv

1 spéch 'd âj tridê fîn o schisê

1 cucêr 'd arbòuni tridêdi fîni

1 cucêr ed pân radû (còst al và druvê se l'impast al dvèinta trôp môl)

'na sigòla un pô céca tridêda fîna

¼ ed bicēr ed cunsêrva 'd pomdôr

brôd al necesâri

 

Preparasiòun

 

Şmercê la murtadèla cun l'ōv, al Grâna radû, l'âj, al j arbòuni e fêr un impâst mia trôp môl, sl'é necesari sistemêr la giósta sustânsa cun al pân radû. Pistêr un pô al fèti 'd chêrna, pó pugêregh l'impâst preparê al necesâri per prèir vujêr só la chêrna per fêr 'd j invultèin da fermêr cun dû stecadèint més ed travêrs. Int 'na casarōla, fêr fònder al butēr, pó sufrézer la sigòla e, quând la sarà indurêda, zuntêregh i valişèin e fêri indurêr da tóti 'l pêrt; zuntêr 'na quêlch cuciarêda ed brôd e la cunsêrva ed pomdôr. Fêr cōşer per 10/15 minût cîrca a mèz fōgh o, in tóti 'l manēri quând la chêrna l'é côta, ógni tânt girêi. Servîr subét.

Naturalmèint cumpagnê da 'n bòun Lambrósch Arşân

 

Curioşitê:

 

Còst l'é 'n' etêr piât pôver ed la cuşèina arşâna. I valişèin a gh'àn dèinter i savōr pió impurtânt ed la nôstra tèra: la murtadèla e al Grâna ch'l'é al prodòt pió impurtânt di nôster caşē. Magnêr i valişèin arşân l'é cme fêr un viâş int la nôstra pruvîncia e sēdres a la têvla 'd óna dal nôstri rezdōri, per bagnêr la bòca int al cōr ed la cuşèina cuntadèina. Difâti i valişèin arşân în 'na pietânsa dimòndi ed sustânsa e per còst, incō a 's fân pôch, cme ménim per la risèta pió antîga. Dimòndi vèc arşân a magnêr i valişèin 's arcurdarân quând ēren céch e i savōr 'd alōra.

La profesorèsa Marta Ferrari int al só léber "Ricette e racconti della mia Reggio", da dóv'è stê tôt cla risèta ché, la dîş ché i dû spēlter 'd cuşèina Vincenzo Bonassisi e Paolo Petrone în d' acôrdi che i valişèin arşân în cme j italiân "involtini" fât ed chêrna 'd vidèl. La profesorèsa l'an nèiga mia cla spiegasiòun ché però, sèimper int al só léber, la cunfèirma che, per só dirèta speriĵnsa, int al cà dal zdōri arşâni i valişèin, in italiân "involtini", a vînen fât cun al filèt ed nimêl.

 

 

E... bòun aptît!