I Sûgh 'd óva

 

 

Col ch' égh vōl per fêr 8 pursiòun:

 

1 léter ed mòst 'd óva Ansalôta o Lambrósch

100 gr. ed farèina '00'

50 gr. ed sócher

La quantitê dal sócher la dipènd da i góst e se al mòst

l'é pió o mēno dōls, la dōşa giósta l'é 'd cîrca 50 gr. per léter.

 

 

 

Preparasiòun:

al mòst al và més a bòjer, da per ló, in 'na parlèta 'd asâr asê lêrga e êlta, perchè al dēv bòjêr sèinsa quêrc. Se quând al bòj as fà 'na s'cióma insém al và 'sciumê cun un mès'c furê. Quând a s'é tôt via la s'cióma o dôp 5/6 minût da quând l'à cumincê bòjêr a se smôrsa al fōgh, as tōş un mesclèin ed mòst e, in 'na scudèla apêrt, as vōd piân pianèin al sûgh insém a la farèina int al mèinter a se smèrcia a mōten cun 'na frósta. In cla manēra ché a s' égh la  chêva a stimprêr bèin la farèina sèinsa che 's gnôca.

A s' utîn 'na cremèina, che l' andrà vudêda dèinter al rèst dal mòst mèinter al se smèrcia.

A cōl pûnt ché as pōl zuntêr ânch al sócher, ânca ché 's dēv serchêr ed fêr mia di gnôch, l'é impurtânt de smercêr bèin fîn a quând a 'sé utgnû un miscóli lés.

Fât còst as tōrn' a piêr al fōgh, cun 'na fiâma piotōst bâsa, as cunténva a smercêr fîn a quând al cumîncia a bòjer, spetêr cîrca un minût o dû préma de smursêr al fōgh (pió al bòj pió al s' infisés).

Al sûgh al dēv dvintêr fés e lócid. As vōda al tót in scudèli bagnêdi cun l'âcva frèda e as lâsa arsurêr. Més in frîgo dôp un pêr 'd ōri al ciâpa l'aspèt ed budèin e 's prà magnêr frèd cme 'n dōls.

 

Curioşitê e cunséli

L'é un dōls di tèimp indrē e 's fà sōl int al peréiod ed la vindèmia o int tót al manēri cun al mòst 'd óva frèsca. L' é un dōls che 's fêva in tèimp indrē int al campâgni arzâni mó incòra incō a gh'é dal faméj, masmamèint cuntadèini, ch' arnûnsien mia a sté dōlsa uşânsa.

La preparasiòun l'é dimòndi a la bòuna, mó as dēv lavurêr sèinsa prèsia.

I sûgh a vân magnê sia cme dōls, sia cme brènda dal dopmezdé.

Se al sûgh l'é 'd óva mia trôp dōlsa as pōl zuntêr pió o mēno sócher. A gh'é chi, a piaşèir, égh zûnta dal cacâo o 'na mèza vintèina ed ciôld ed garôfen e 2 o 3 pcòun ed canèla. A secònd di góst a prî fêrel pió o mēno insavurî cun al crèser o calêr al dôşi di ciôld ed garôfen e canèla, còsti però în, cme dét, zûnti dal tót personêli.

'Na vôlta es metîven ânca soquânti pèli 'd l' óva, in môd che i sûgh a dvintésen pió scûr.

Al sûgh 'd óva, in pió che mantgnîres per un bèl pō ed tèimp (se mantgnû in un pôst frèsch), al pōl èser preparê fōra stagiòun s 'es mèt in frîşer quêlch léter (in butélia) ed mòst per l'invêren.

Un quèl: se dôp soquânt dé al vôster sûgh al fà 'na pelécola o al preşèinta di sègn ed mófa insém an preocupêdi mia, l'é asê tôri via e magnêr al vôster dōls in tranquilitê.

'Na quêlch azdōra, mia tânt tèimp fa, la vudêva i sûgh dèinter a dal terîni a i quacêva cun di burâs e i tgnîva dacât int al granêr, i sûgh a gnîven pó magnê per Nadêl.

L'é 'd uşânsa che sté sôrta ed budèin 'd óva as fà cun al mòst 'd l'óva nîgra mó as pōl fêr ânca cun còla biânca.

O biânca o nîgra druvê 'd l' óva dōlsa pó vedrî che al rişultê al srà cesiunêl.

 

E... bòun aptît!