|
Intrigòun
|
|
Còl ch' a 'gh vōl:
500 gr. ed farèina 2 ōv 150 gr. ed sócher 75 gr ed butēr 1 psîgh bundânt 'd alvadōr 1 bicirîn bundânt ed Sasulèin o Sambûga 1 bicirîn ed lât 1 cucêr ed vèin biânch 'na scôrsa 'd limòun radûda 'na scorza 'd arâns radûda |
|
Intrigòun (da Wikipedia) |
|
Preparasiòun:
Inmurbidîr al butēr. Vudêr la farèina insém a la tulirōla, fêregh un bûş int al mèz. Smercêr insèm j ōv, al sócher, l'alvadōr, al Sasulèin o la Sambûga, al scôrsi radûdi dal limòun e 'd l'arâns, al lât, al vèin e la farèina e impastêri bèin. Zuntêr al butēr e impastêr incòra fîn avèir 'na pâsta lésa e môrbida. Fêr 'na bâla e vujêrla int la pelécola da cuşèina e lasêrla in frîgo per 30 minût. Divéder pó la bâla in 4 o 5 pcòun, cun la canèla fêr dal sfèj êlti pôch milémeter ( 2 cîrca), Tajêr cun la rudlèina al sfòj a rumbèin ed cîrca 7 centémeter per lê e fêregh dû o trî tâj ed travêrs (opór tajêr dal strési lêrghi dû dî e divédri in retângol ed 7 centémeter cîrca, dèinter fêregh dû o trî tâj) in dó infrucêregh un ângolo dal rumbèin (o dal retângol). As vîn avèir un rumbèin cun dō pûnti a i cò perché al j êtri dō a srân infrucêdi int i tâj, a s intrèsen acsé in môd ed fêr còl ch' a vin ciamê l' "intrigòun". Tōr 'na padèla cun j ōrel êlt, mètregh dimòndi ôli per fréşer (dmèj al distrót) e quând l'é bèl chêld fréşêr j intrigòun pôch a la vôlta fîn a quând a dvèinten un pō durê dal dō pêrti.Tōri só e pugêri insém a 'd la chêrta da cuşèina e, a frèd, spulvrêrli ed sócher a vēl. In bòun magnê cun la pâna muntêda da dōls e 'na bòuna butélia ed Malvaşìa arşâna.
Curioşitê:
Quisché în i dôls carateréstich dal Caranvêl arşân, mó Rèz, ânch ind i tèimp indrē, l'an gh'à mai 'vû 'na grân pasiòun per cla fèsta ché. Int l' Otsèint, in cól peréiod ché, a Rèz a gh'ēra la stagiòun lérica al Municipêl e a gh'ēra l'abitódin ed fêr dal gustōsi sèini int i cambarèin dedrē a ògni pêlch dal teâter. As fêven ânch di bâl mascherê mó an 's fêva gnînt p'r al strēdi cme al sfilêdi di câr cun la mùşica e gróp ed gînta mascherê. Invēci in pruvîncia la fèsta l'é dimòndi sintûda e in tânt paèiş a gh'é di laboratôri 'd artigiân specialişê per fêr dal mâscheri, custóm e ânca di câr legôrich, ânca per i caranvêl 'd êtri regiòun. Al Caranvêl pió cgnusû ed la pruvîncia l'é còl ed Castelnōv ed Sòt ciamê al "Castlèin".
E... bòun aptît! |