Guastâla

 

Nôta: al stèma dal cmûn ed Guastâla l' é stê tôt da www.araldicacivica.it e l'avtôr l'é Massimo Ghirardi.

In dó l'é

 

L'é int la Bâsa arşâna pôch luntân a la riva dréta dal Po, e a cîrca 30 chilômeter da Rèz, Pèrma e Mântva.

 

In pió dal cèinter, al cmûn ed Guastâla l'é fât dal frasiòun ed Sân Jâchem, Sân Girôlem, Sân Martèin e Sân Rôch.

 

Al Cmûn cunfîna a nôt cun Lusêra, a matèina cun Rezōl, a mezdé cun Nuvalêra e Cadelbôsch ed Sōver, a sîra cun Gualtēre e Dôşel, l'é a i cunfîn cun la Lombardéia (pruvîncia ed Mântva). A sîra al cèinter l'é schivşê dal Cròstel che prôpria ché as bóta in Po.

 

Al teritôri l'é traversê matèina a sîra da la strêda pruvincêla SP62r, da la strêda Cispasdana e da la ferovéia Pèrma-Suşêra e da la ferovéia ch' la rîva da Rèz; da Rezōl égh rîva la strêda pruvincêla SP2, da Nuvalêra la strêda pruvincêla SP42, dal pûnt insém al Po la strêda pruvincêla SP35.