Al Gnôch frét

 

 

Preparasiòun.

 

Vudêr insém a la tulirōla al tót e impastêr, con al lât tèved, fîn a quând l'impâst l'é lés e tót cumpâgn, fêr alvêr per un'ōra cîrca al calōr ed l' ambiĵnt e quacê da 'n burâs. Tirêr a sfòja l'impâst fîn a rivêr a un spesōr ed cîrca 4 o 5 milémeter, cun la rudlèina tajêr la pâsta a ròmb o quêder ed 8 – 10 centémeter e frişî, in bundânt destrót buĵnt, fîn quând a s' în bèi infiê e che sìen indurê da tóti e dō al pêrti. Servî bèin chêld cun di salóm, furmâj a piaşèir a da un bòun Lambrósch.

 

Curioşitê.

 

Ânca còst l'é un piât ómil ed la cuşèina arşâna: un impâst d' âcva, farèina, sêl e destrót incô cambiê cun butêr o ôli. Ind al cà di cuntadèin 'd un tèimp l'êra fât cun la pâsta dal pân alvêda. Al dé dôp al gnôch frét cun al lât l'êra, per chî stêva in campâgna, la clasiòun preferîda. L'êra ânca l'arsōr ed mèza matèina per chî lavurêva ind i câmp. La zdōra cun al cavagnîn pîn ed gnôch frét pèina fât, cun soquânt butéli ed vèin sutîl frèsch e 'na quêlch fèta ed salâm, quând al gh'êra, la partîva e la purtêva la brènda a ch' j òm ch' a tribulêven ind i câmp. La sudisfasiòun ed la zdōra l'êra turnêr a cà cun al cavagnîn vōd e sintèir, drêda al só spali, cantêr in alegría.

Incō, cun i salóm pió fîn, l'é un magnêr o 'na brènda serchêda da dimòndi gînta.

 

E...  bòun aptît!

 

Còl ch' agh vōl per 4 persòuni:

 

500 gr ed farèina

40 gr ed destrót

40 gr 'd alvadōr ed béra

un psigôt ed bicarbunê ed sôda

al necesâri ed lât