I Ciocabèch cun l'ōv

Còl ch' a 'gh vōl per 'na persòuna:

 

tânt gâmb ed ciocabèch da quacêr al fònd 'd un piât e spiân

'na branchêda ed Grâna

2 ōv

'na nōşa ed butēr

sêl còl ch' a 'gh vōl

 

Preparasiòun:

dôp avéiri pulî da la tèra e bèin lavê cōşer i ciocabèch, un pô al dèint, in 'na tègia cun 'd l'âcva, scunî bèin a mōten e metî i gâmb ûn atâch a cl' êter in 'na tegîna da frézer in dóve a 'î fât deşfêr la nōşa ed butêr. Stremnê la branchêda ed Grâna insém a i ciocabèch. Quând al furmâj al cumîncia, dôp un pô, a desfêres vudê, insém a i ciocabèch, j ōv intēr e lasê cōşer a piasèir. Salê e servî chêld.

 

Cgnusòmi ed mèj

In italiân a vînen ciamê ''Barba di Becco'' in grēch ''Tragopogon pratensis'', dal nôstri pêrti l'é 'na piânta ch' la crès ind i câmp stâbil fîn a doméla mēter, l'é êlta da i 20 a i 70 centémeter, la fiurés da mâg a zógn cun di fiōr zâj, al fóst l' é fasê cun dal fòj a pûnta, sutîli e lònghi, i frût în fât a bèch cun di pèil d' atōren, per cost a vînen ciamê in italiân ''Barba di Becco''.

A vînen tôt só in premavèira, préma che fiurésen . A 's mâgna al fòj, al raîş e i zermòj zôven, a 's pôlen druvêr a fêr dal mnèstri o dal fritêdi, mó a 's pōlen magnêr ânca crûd,  a gh' àn un savōr dōls, în diurètich e a fân bèin per quî ch' a patésen de stòmegh, 'd altèrio, revmatîşem, e chî gh' à la presiòun êlta

Per trêr dal benefési dal raîşi bişògna magnêri tajêdi a fèti e crûdi cundîdi a piaşèir.

Stê atèint perché i frût în vlenōş e a vân mìa magnê!

 

Curioşitê

L'é 'n' êrba che dimòndi ed quî ch' an mìa superê la barēra di sinquânta an sân cós' în. Ind al campâgni arşâni, chî gh' àn pió ed sinquant' ân, în bèin pôch quî ch' a pôlen dîr d' an 'vèir mai magnê i ciocabèch a j inési ed la premavèira. Tót só frèsch e magnê a pòm l' ēra 'na lifgnaréia pr' i vèc e i zôven. Al latés che al vîn fōra quând a se stâchen da la raîşa al mâcia i dî e i lâber ed maròun.

Côt a lès, cun butêr, furmâj e ûn o dû ōv l'ēra un piât a la bòuna, ch' al custêva pôch e apetitōş. A gh'ēra dal rezdōri che druvêven i ciocabèch per fêr al pést di turtē vèird. Mó l'é necesâri èser spêlter pr' arcgnòsri e an cunfòndri mìa cun dal j êtri êrbi mìa bòuni da magnêr e dal vôlti ânca tôşighi o vlenōşi.

 

E... bòun aptît!

Ciocabèch fiurî