Al Chési

 

Preparasiòun.

Şmercê la farèina cun al butêr, al destrót, l'ôli, l'alvadôr e l'âcva, impastê fîn a quând l' impâst al dvèinta lés e tót cumpâgn. Spianê la pâsta a sfòja mìa trôp sutîla, tajê cun la rudlèina tânt quêder ed 6/7 centémeter, insém a tót metîgh 'na scâja ed Grâna, unî dû ângol, schisê j ôrel per sarêr al teriângol.

Frişî òna a la vōlta ind al destrót buiĵnt fîn quând în indurêdi. Servî chêldi cun un bòun Lambrósch.  

 

Curioşitê.

L'é 'na specialitê arşâna che fōrsi la deşvîn da j ûş ed la cuşèina ed j ebrèi. Al chési preparêdi al dé d' incô a sumélien pôch a còli ch' a gnîven fâti 'na vōlta.

A i prém dal XX sècol al chési a gnîven fâti ind al ghèt ed j ebrèi ed Rèz,  jostapûnt in véia ed l' Aquîla, dal furnêr Federico Sarcedoti ciamê Salamèin e êren fâti cun la pâsta sfòja, al Grâna, l'agrèst ('na sêlsa d' óva aşêrba fâşta bòjer dimòndi ōri e che al d d'incô an 's drôva pió)  e cundîdi cun di savōr armêş secrêt.

A 's dîş ânca che, préma dal chési fâti cun la risèta rivésta da Salamèin e ciamêdi ''ristocrâtichi'', in véia ed l'Aquîla a gnîven fâti dal chési, ciamêdi dōp ''democrâtichi'', cun dla rôba mēno fîna e vindûdi a un bòun prèsi a operâri, a studèint e cumprêdi da chi gh' îva pôch sôld.

 

E... bòun aptît!

Còl ch' agh vōl per 4 persòuni:

 

350 gr ed farèina

150 gr ed Grâna

15 gr ed butêr

15 gr ed destrót

2 cucêr d'ôli bòun

'na mèza bustèina d' alvadōr

al necesâri d' acva e 'd sêl