I Casagâj

 

Col ch' a 'gh vōl per 4 persòuni:

 

350 gr. ed farèina zâla

200 gr. ed faşō burlôt

70 gr. ed pansèta

'na sigòla céca

un cucêr rêş ed destrót

sêl e pèiver

 

Preparasiòun:

Cusî a lès i faşō més in mòi in dû léter d'âcva salêda la sîra préma. In 'na tègia, fê sufréşer ind al destrót la sigòla tridêda e la pansèta, quând la sigòla l'é dvintêda pâsa unî i faşō côt, scunî da l' âcva, e féi insavurîr.

Ind l'âcva ed cutûra di faşō vudê pôch a la vôlta la farèina e fê 'na pulèinta piotôst pastōşa (a 'gh vrà 'na mèz' ōra), pó vudêgh tót i faşō ch' avî prêparê préma. Impastê bèin al tót insém al fōg per cîrca un quêrt d' ōra: 'Na vōlta prûnt i casagâj a 's pōlen magnêr chêld, vudê in un piât fònd, senò a 's vôden e a 's parèşen bèin in un stâmp fât a retângol a 's lâsen dvintêr frèd pó a 's tâjen a fetlèini e pó a 's fréşen ind al destrót buĵin. Fêgh ciapêr 'na bèla grustlèina da tóti e dō al pêrti, scunî bèin a mōtem insém a 'na chêrta zâla e servî bèin chêld.

 

E... bòun aptît!