Al Scarpasôt

Còl ch' égh vōl

 

500 gr ed bēdi zōvni o bēdi mó da druvêr sōl la fòja vèirda sèinsa al custòun

500 gr de spinâs

'na nōş ed butēr

50 gr ed lêrd o pansèta tridêda

90 gr ed grâna radû

50 gr ed pân radû

1 o 2 ōv

2 cucêr ed farèina

sêl

oli bòun

 

Preparasiòun

Al tèimp p'r avèir prûnt al scarpasôt l'é un pô lòngh, mó sōl a câşva 'd la cutûra ch'la dûra 'n pêr 'd ōri.

Dôp avèir bèin lavê 'l bēdi e i spinâs, tridêri e mètri in un sculadōr, pó salêr e lavuêr bèin cun al mân fîn a ch' âbien butê fōra tót al lécvid che gh' àn dèinter. Mètri in 'na tègia e zuntêr tóta cl'êtra rôba mēno l'ôli bòun. Şmercê bèin al tót in môd 'd utgnîr un impâst tót cumpâgn e lasê arpunsêr un pô. Dôp vudêr un pô 'd ôli int 'na padèla ch' a's tâca gnînt e vudê l'impâst fât préma. Lasêr cōşer piân sèinsa 'l quêrc, pó quacê lasê andêr a fōgh dimòndi bâst per cîrca 'n' ōra. Şmursê al furnèl e lasêr gnîr frèd. 'Na vôlta che 'l scarpasôt al srà dvintê frêd scaravultê la padèla cun al quêrc in môd 'd avèir al scarpasôt in séma 'l quêrc, pó turnêr a mètrel int l'istèsa padèla mó vultê da cl' êtra pêrt in môd da fêr cōşer al scarpasôt in môd pêra da tót al dō pêrti. Lasêr incòra la padèla in séma 'l furnèl a fōgh dimòndi bâs per 'n' êtra ōra cîrca. A sté pûnt al scarpasôt in padèla l'é prûnt da purtêr in têvla.

'N' êtra manēra ed cōşer al scarpasôt l'é còla de scalder al fōren a 180°, vudêr sèimper int 'na tègia in dó 'as tâca gnît e lasêr la tègia int al fōren per 20 minût cîrca.

Opór fêr dal fritèli rotondi ed 10 centémeter cîrca, êlti 1 centémeter e mèz cîrca e frézer in ôli bèin chêld, stê atèinti an dēven mìa bruşêr, al d'ed dèiner al dēv armâgner pastōş.

 

Curioşitê

Secònd l'uşânsa antîga , la risèta dal scarpasôt l'é diferèint dal scarpasòun Arşân perchè an vîn mìa druvê la pâsta d'ed fōra per quacêr al pést de spinâs e furmâj. Al scarpasôt cun sôl al pést l'é da cunsidrêr óna dal tōrti salêdi pió léfi e ind l'istès tèimp pió fâcili da fêr ânca s'égh vōl un pô 'd sovermân int al pulîr al bēdi e i spinâs e int al strichêri per scartêr l'âcva che gh' àn dèinter. Incō al scarpasôt a's cōş int al fōren normêl o ventilê. Un tèimp, invēci, a's cuşîva int al fōren ed la stóva a lègna o int al fōren dôp avèir côt al pân.

 

E... bòun aptît a la fâcia 'd la diēta!

Risèti arşâni