Al Sangunâs arşân

 

Còl ch' é gh vōl per 4 persòuni:

 

400 gr. 'd sânghev ed nimêl apèina masê

150 gr. 'd pân radû

150 gr. 'd Grâna radû

70 gr, 'd lêrd

50 gr. 'd pansèta

4 ōv

2 spîgh 'd âj tridê fîn

1 sigòla

sêl e pèiver al necesâri

 

Preparasiòun:

 

Int 'na padèla lêrga e bâsa fêr sufréşer la pansèta, la sigòla e al lêrd, tridê a pcòun céch, cun al sêl e al pèiver. Int al mèinter preparê a pêrt un impâst cun al sânghev, al pân, al furmâj, j ōv e l'âj int al fêr còst şmercê a la şvéla per fêr in môd che 'n vègnem mia di cagiòun. Quând la sigòla e la pansèta dal sufrét a cumîncen a indurêr unî l'impâst int la padèla e fê cōşer e şmercêr in cuntinvasiòun per 5 minût cîrca  fîn quând al sangunâs al ciâpa l'aspèt ed 'na fritêda o fê dal grôsi fritèli da cōşer óna la vôlta e da cōşer da 'na pêrta e da cl'êtra.

Servî bèin chêld, da per ló o insèm a 'n'  insalêta 'd radéc cundî cun l'aşèj balsâmich

Naturalmèint cumpagnê da 'n bòun Lambrósch Arşân

 

Curioşitê

 

Dal nôstri pêrti a gh'é dimòndi mudéfichi a sté risèta. Soquânt a cōşen al sânghev insèm al sêl e la sêlvia fîn a fêrel cagêr. Pó 'l tâjen e al servésen cun la pulèinta fréta.

Ed j êter al fân cagêr e dvintêr dûr, pó al tâjen a fèti e al cōşên in un sufrét ed sigòla tajêda fína dimòndi indurêda cun ôli e butēr e pó égh zûnten ed la cusêrva 'd pomdôr deşfâta in âcva tèvda.

Al sangunâs l'é la dimustrasiòun pió bòuna che dal nimêl a 's bóta via gnînto.

Int la masêda dal nimêl óna dal j operasiòun pió impurtânti l'é, apûnt, cavêr dal tót al sânghev  dal chêrni. Al dēv èser cumplēt, perfèt per fêr in môd che 'l chêrni dal nimêl a pôsen èser druvêdi, sia frèschi che stagiunêdi, int al miliôr môd pusébil.

Al sânghev al pōl èser druvê perfîn ind l'îndóstria dal farmacèi e in còla di mangém, al vîn druvê dimòndi ânch in cuşèina, in quêşi tóti 'l regiòun al vîn druvê per preparêr di piât pôver dōls o salê mó dimòndi apetitōş

In dimòndi regiòun al sânghev al vín côt e insachê cun divêrs elemèint.

Int al Mantvân, per eşèimpi, cun l' óva pâsa e i pgnō.

La parôla "sangunâs" l'é ânca al nòm ed 'na crèma dōlsa cun l'elemèint principêl la ciculâta fundèint amêra insavurîda cun sânghev 'd nimel frèsch, ch' al lâsa in bòca un savōr acidōş, la vîn magnêda cun i savujêrd che guarnésen ânch al còpi in dó la vîn servîda. L'é un dōls, ed la Bâs' Itâlia, ch' al vîn preparê int al peréiod dal Carnevêl insèm a ch' j êter dōls cme j intrigòun. In Abrós la vîn destèiş inséma 'l pân. L'é cgnusû in Ligória, int al Mêrchi, in Calâbria, in Campâgnia e in Rumâgna, a Mudgiâna (Modigliana) in pruvîncia 'd Furlé al sânghev ed nimêl al vîn şmercê cun rîs côt int al lât, sócher, sâba, fècola 'd patâti, mustêrda, cicolâta, scôrsa 'd limòun e ōv. Mès int 'na tègia insém al fōgh per pôch tèimp pó vudê in un stâmp e més a cōşer int al fōren a fōgh bâs.

L'é ânca 'l nòm 'd un salâm salê cun dèinter j arquèst tridê, al sânghev dal nimêl e cun i savōr in ûş int al cunsèini dal regiòun in dó 'l vîn preparê; al gh'à cól nòm ché ânca 'na sôrta ed cudghîn cun la zûnta, int l'impâst, dal sânghev dal nimêl.

 

 

E... bòun aptît!