Al Cunîn aròst a l'arşâna

 

Còl ch' égh vōl:

 

1 cunîn zōven 'd un chîlo e mèz cîrca

60 gr. ed butēr

5 cucêr 'd ôli bòun

3 fòj ed sêlvia

3 ramèt ed tém

2 ed ruşmarèin

2 spîgh 'd âj

1 bicēr ed vèin biânch sèch

aşèj ed vèin biânch

farèina

pâna

sûgh ed limòun

brôd ed dê còl ch'égh và

 

Preparasiòun:

 

Tajêr al cunîn in 6 pêrti (al dô sampi davânti, al dô sâmpi dedrē e la schina in dû pès) mètri in mòj per 5 ōri cîrca in dû léter 'd âcva cun 'd l' aşèj. Tirêri via,e mètri sòta l'âcva e lasêrla córen insém fîn a quând la chêrna l'é quêşi biânca dôp mètri in padèla a fōgh vîv per pôch minût per sughêri.

A pêrt, cun al sêl grôs, tridêr l'âj, la sêlvia, al ruşmarèin, al tém, zuntêregh un cucêr 'd aşèj o, edmèj,  'na quêlch gòsa 'd aşèj balsâmich e l'ôli.

Arvultêr per bèin la chêrna int la cûnsa, mèterla int la tègia da fōren, zuntêr l'ôli, 20 gr. ed butēr e vudêr al rèst ed la cûnsa insém a la chêrna, lasêrla in frîgo per almēno 12 ōri.

Al dé dōp indurêr a fōgh vîv, zuntêr al vèin e lasêr şvapurêr, zuntêr al brôd e mèter in fōren a 180° cun al quêrc.

Tgnîr a drē a la cutura, ògni tânt arvultêr i pès per mantgîr la chêrna tèndra. Quând la chêrna l'é côta tulî via al cunîn da la tègia, culêr al fònd ed cutûra in 'n êter recipiĵnt. In un tegîn a pêrt, mèter a fōgh 40 gr. ed butēr, zuntêregh la farèina e smêrcêr, unîr al sûgh ed limòun e da ûltma la pâna ch' l' an dēv mia bòjêr; mèinter şmercê vudê pôch a la vôlta al fònd ed cutûra. Pugê al cunîn int la tègia ed cutûra, vudêr la sêlsa insém a i pès ed chêrna, turnê a mèter insém al fōgh vîv fîn a quând al sûgh al dvèinta lócid.

Al cunîn côt acsé al gh' à la chêrna né stupaciōşa né sfilaciōşa e la 's tâja cun un grisèin grân ch'l'é tèndra.

Cól piât ché al và cumpagnê cun un bòun Lambrósch Arşân o un bòun Lambrósch Salamèin ed S.Crōş.

 

Cuiriositê:

Al cunîn arôst al fà pêrta ed l'uşânsa ed la cuşèina arşâna, l'ēra cuşinê préma ed tót in campâgna. La gâbia di cunîn l'ēra tgnûda a drē dal dòni che, un tèimp, la mantgnîven cun pôca spèişâ: ròmel e êrba. I bèsi ciapêven dal dòni êren spèiş per cavêres 'na quêlch vòja, mèinter p'r al pió zōvni ēren sôld da mèter via per la dôta.

S' andòm a lēşer al pàgini ed la cuşèina italiâna, int i grôs dişnêr ristocrâtich al cunîn an figurêva mai perchè l'ēra cunsiderêda 'na chêrna da pôch in cunfrûnt ed còla 'd êtri bèsti pió stimêdi, l'é dvintê un magnêr comûn insém a la têvla sitadèina ed tót i dé sōl da trèinta o quarant'ân.

Ânca incō, però, cla chêrna ché, ch' la zibés un bòun ajót in fât ed caluréi sèinsa şagerêr in grâs, an n'é mia magnêda despès e cun la bundânsa ch'la meriteré.

 

 

E... bòun aptît!